Бизнис
ВО ХРВАТСКА ОДОБРЕНИ 4 МИЛИОНИ ЕВРА КАКО ПОВРАТ НА ДАНОК ЗА КУПУВАЊЕ НА ПРВ СТАН
23.07.2025
До Агенцијата за правни трансакции и посредување во недвижности (АПН) во Хрватска во првиот месец и половина од спроведувањето на мерката за враќање на данокот на првиот станбен имот пристигнале повеќе од 1.000 барања од граѓани. До сега се обработени над половина од пристигнатите барања, додека вредноста на моментално одобрените грантови е 3,65 милиони евра. Највисокиот одобрен грант изнесува 26.876 евра. Корисниците на повратот на данок се во просек на возраст од 32 години, додека просечната квадратура на стан е 64 квадратни метри.
Како што објавија од АПН обработени се 575 барања, кои се решени во рок од 30 дена, што е законскиот рок. Бројот на одбиени или отфрлени барања сè уште останува доста низок и изнесува осум проценти, а меѓу причините се, меѓу другото, возраста на подносителите на барањето, односно дека се постари од 45 години, поседуваат сопственост на друг недвижен имот и друго.
Само мал дел од одбиените барања се однесуваат на цена што е повисока од просекот, според пресметката на Економскиот институт во Загреб.
- Од вкупниот број обработени барања, само 3,15 проценти се одбиени поради цената што го надмина просекот за одредена единица на локална самоуправа, објавија од АПН.
Според досега примените и одобрените барања, просечната цена по квадратен метар во Хрватска е 2.925 евра со вклучен ДДВ. Најголем број барања се примени за подрачјето на градот Загреб, каде што досега се одобрени 237 грантови, а просечната цена по квадратен метар е 3.140 евра со вклучен ДДВ, пренесува Пословни дневник.