Бизнис
И ВТОРАТА ГЕНЕРАЦИЈА РАБОТНИЦИ - ИМИГРАНТИ ЗАРАБОТУВААТ ПОМАЛКУ ОД ГЕРМАНЦИТЕ
20.07.2025
Имигрантите во Германија во просек заработуваат значително помалку од Германците, а истото важи и за осум други земји, според меѓународна студија спроведена од Институтот за истражување на пазарот на трудот и занимањата (IAB) за списанието Nature.
Во Канада, Данска, Франција, Холандија, Норвешка, Шпанија, Шведска и САД, разликата во платите кај втората генерација имигранти исчезнува побрзо отколку во Германија, објавува ДПА.
Во Германија, имигрантите од првата генерација заработуваат 19,6 проценти помалку од Германците. Главната причина не е нееднаквоста на платите за ист вид работа, туку ограничениот пристап до подобро платени позиции во одредени сектори, професии и компании.
Студијата се базира на анализа на примерок од 13,5 милиони имигранти и домашни работници во девет земји.
„Интеграцијата не е само иста плата за иста работа. Првенствено станува збор за отстранување на структурните бариери за премин кон добро платени работни области“, вели Малте Рајхелт, еден од авторите на студијата.
Стимулациите за учење јазици, нострификација на странски дипломи, градење професионални мрежи и подобра информираност се важни за отстранување на тие бариери.
Во Германија, дури и втората генерација имигранти се соочува со јаз во заработката од просечно 7,7 проценти. Оваа разлика, секако, е помала од она што го доживеале нивните родители, но особено ги погодува луѓето од Африка и Блискиот Исток.
Постојат значителни разлики во меѓународната споредба: најголемата разлика во платата на првата генерација имигранти е во Шпанија (29,3 проценти) и во Канада (27,5 проценти). По неа следуваат Норвешка со 20,3 проценти, Германија со 19,6 проценти, Франција со 18 и Холандија со 15,4 проценти.
Разликата е многу помала во САД (со 10,6 проценти), Данска со 9,2 и Шведска со седум проценти. Просечната разлика кај втората генерација имигранти во Германија е 5,7 проценти, пренесува Бизнис.рс.
фото freepic