Бизнис
БУГАРИЈА ПРЕД ВОВЕДУВАЊЕ НА ЕВРОТО, страв од нова криза и банкрот на малите претприемачи
18.07.2025
Сопствениците на мали бизниси во Бугарија се загрижени пред воведувањето на еврото, плашејќи се дека тоа би можело да биде уште една криза што ќе мора да ја надминат. Бугарија ќе го воведе еврото како официјална валута на 1 јануари 2026 година.
Последниот месец во Бугарија имаше значително зголемување на цените од страна на добавувачите, што предизвика страв од банкрот кај малите претприемачи.
„Транзицијата кон еврото не е главниот проблем. Вистинскиот проблем е што предизвикува зголемување на цените. Кога цените растат, а куповната моќ опаѓа, која е реалноста во Бугарија, а луѓето купуваат помалку, па ние продаваме помалку“, вели сопственик на продавница за органска храна.
Според најновото истражување на Евробарометар, 50% од Бугарите се против воведувањето на еврото, додека 43% се „за“. Граѓаните изразуваат страв од инфлација и недоверба во институциите. По неколкугодишната парламентарна криза земјата имаше седум влади за четири години. Од друга страна, има и такви кои на промените гледаат со оптимизам. Тие не веруваат дека „еврото е причина за инфлацијата“ и сметаат дека постојат и други фактори за зголемување на цените.
Европскиот парламент неодамна го одобри приемот на Бугарија во еврозоната, што ќе ја направи 21-ва членка на овој монетарен блок. Од 8 август, сите цени во Бугарија мора да бидат прикажани и во евра и во левови, пренесува Инвеститор.ме.