Бизнис
Родот на пченицата е поквалитетен, но откупната цена од 12 денари делумно се почитува, предупредуваат македонските земјоделци
12.07.2025
Годинава родот на пченицата е поквалитетен, жетвата се одвива непечено, а од откупувачите бараме да го почитуваат договореното за плаќање по 12 денари за килограм и трошоци за транспорт, вели Петре Стојкоски, претседател на Асоцијацијата на земјоделци и фармери.
Стојкоски смета дека откупувачите калкулираат.
- Цврсто се договоривме на работен состанок со министерот за земјоделство и со откупувачите дека цената на пченицата ќе биде 12 денари плус транспортните трошоци. Но, мора да кажеме дека делумно таа ситуација се почитува што, за жал не е добра работа, зашто откупувачите пред сите нас и пред Министерството за земјоделство потврдија дека цената ќе биде 12 денари плус превоз. Таа состојба откупувачите не ја почитуваат. Ако платат 12 денари, нема да дадат за превоз и, обратно, ќе дадат 11 денари за откупен килограм и за превоз, вели Стојкоски.
Прашањето со складирањето на пченицата е решено. Се уште останува во сила договорот за секој оној кој сака да ја чува пченицата во овластени силоси за чување, а државата ќе им плати. Единствено отворено прашање за Асоцијацијата е што го нема завршено разговорот со Министертството за земјоделство за дополнителни средства за пченицата, по четири денари за килограм. Тоа ќе биде стимул за производството , а и за намалување на зависноста од увозот.
Како мерка и стимул, неопходно е прво домашното производство да се потроши, па потоа да се увезе пченица, препорачуваат македонските земјоделци.
Извор МИА
фото freepic