Бизнис
ЕВЕ КАКО СЛОВЕНЦИТЕ ЈА КОРИСТАТ ДОМАШНАТА ЖЕЛЕЗНИЦА, ДОДЕКА НИЕ ГО ЧЕКАМЕ БРЗИОТ ВОЗ
12.07.2025
Во домашниот железнички сообраќај во Словенија минатата година биле превезени околу 15,2 милиони патници, односно осум проценти повеќе од претходната година. Во меѓународниот сообраќај, бројот на патници се намалил за девет проценти на 1,5 милиони. Лани во Словенија со железницата се превезени шест проценти повеќе патници отколку во претходната година.
Според податоците, Државниот завод за статистика, минатата година во домашниот и меѓународниот железнички сообраќај биле превезени 1,09 милијарди патнички километри, од кои 77 проценти во домашниот сообраќај, што претставува раст од 20 проценти. Вкупниот број на превезени патнички километри е зголемен за една десетина во споредба со 2023 година.
Минатата година, со возови биле превезени нешто повеќе од 18,4 милиони тони стока, односно четири проценти помалку од претходната година, а биле превезени 4,57 милијарди тонски километри, односно еден процент помалку. Во меѓународниот сообраќај, вклучувајќи го и транзитот, биле превезени 88 проценти од стоката, односно два процентни поени повеќе од претходната година.
Железничката мрежа во Словенија вклучува 1.207 километри железница, од кои 325 километри се двонасочни, а 605 километри се електрифицирани. Минатата година, Словенечките железници поседувале 359 влечни возила, од кои 156 локомотиви и 203 моторни единици, како и 389 патнички и 1.995 товарни вагони, пренесува Сеебиз.