Бизнис
Висината на минималната плата во Србија ќе биде позната за две недели, целта е да достигне 650 евра
03.07.2025
Во Владата на Србија денеска се одржа колегиум на Социјалниот и економски совет, каде што тема на дискусија беше предлогот на Владата за зголемување на минималната плата во Србија, објави министерот за финансии Синиша Мали. Во следните две недели ќе има состанок на Социјалниот и економски совет, каде што ќе се донесе конечната одлука за зголемувањето, информираше министерот по завршување на состанокот.
Претседателот на Србија, Александар Вучиќ, неодамна изјави дека верува оти работодавачите ќе прифатат зголемување на минималната плата, како и дека државата ќе преземе дел од овој товар.
- Верувам дека ќе има (зголемување) и дека работодавачите ќе прифатат, претпоставувам, бидејќи се општествено одговорни и разбираат дека државата ќе преземе значаен дел од товарот врз себе во ова зголемување на минималната плата, изјави Вучиќ минатиот месец.
Државата претходно објави дека зголемувањето на минималната плата е планирано во две фази - од октомври годинава и јануари 2026 година, со цел минималната плата во 2028 година да изнесува 651 евро, објавија српските медиуми.
фото freepic