Бизнис
ИНДУСТРИЈАТА ЗА ПРОИЗВОДСТВОТО НА ТЕНКОВИ ИЛИ НА АВТОМОБИЛИ? - која повеќе придонесува за економскиот раст на Германија
03.07.2025
На 18 март годинава германскиот парламант донесе одлука за најголемо историско задолжување преку усвојувањето на инвестицискиот пакет за инфраструктура и за развивање на проекти во одбранбената индустрија. Ова е продолжување на „златното време“ на германската одбранбена индустрија и компании, чии претставници изјавуваат дека ова ќе донесе корист и на земјата преку поголем економски раст. Сепак, економистите во Германија се обидуваат да ја смират еуфоријата по парламентарното одобрување на „гигантскиот конјуктурен проект“.
Тоб Кребс, професорот по економија на Универзитетот во Манхајм, во извештајот за буџетскиот одбор на Бундестагот, ја изнесе прогнозата дека „зголемувањето на државните воени издатоци ќе ја поттикне германската економија, но тој економски ефект ќе биде умерен“. Во новата студија Кребс и неговиот колега Патрик Качмарчик, посочуваат дека овие вложувања ќе овозможат „мала добивка, но со високи трошоци“, пишува Дојче веле.
Имено, во истражувањето за тоа како дополнителните државни и воени издатоци влијаат на бруто домашниот производ се доаѓа до фактор од максимално 0,5, што значи дека на едно евро од државниот буџет во најдобар случај се добива дополнителна економска активност од 50 центи. За споредба, инвестициите во инфраструктурата, во образованието и за грижа на децата во градинка и училиштата се враќаат за двапати или трипати.
- Од економска перспектива, планираната милитаризација на германската економија е ризичен влог со ниски вкупни економски приноси, вели Кребс за Дојче веле.
Објаснувањето е едноставно, кога ќе се произведе тенк тој стои во резерва или на крајот ќе биде уништен. Тој не создава дополнителна економска вредност. Производството на воена опрема не носи голем економски раст, што се гледа низ примерот на најголемата германска компанија од војната индсустрија. При зголемените нарачки и побарувачка, но при ограничена конкуренција во овој производен сектор, доведува до зголемување на цените . На ова предупредуваат и германските економисти Кребс и Качмарчик, кои пишуваат дека „зголемените одбранбени трошоци помалку придонесуваат за борбената подготвеност, а многу повеќе на профитните маржи и дивидендите на воените компании“.
Меѓутоа, голем број од цивилната гранка на индустријата гледаат можност за подобрување на економските активности, посебно на компаниите од автомобилската индустрија во Германија и металопреработувачката индустрија, пишува Дојче веле.
фото freepic