Бизнис
Мицкоски очекува буџетскиот дефицит да биде понизок од четири отсто
02.07.2025
Претседателот на Владата, Христијан Мицкоски очекува буџетскиот дефицит да биде понизок од четири отсто, а веќе наредната година да биде, како што рече „во онаа рамка од 3 отсто, подолу од 3 отсто, која што требаше одамна да ја постигнеме, пред неколку години“. Тој денеска посочи дека во делот на фискалното консолидирање за жал претходната влада ја има испуштено можност, кога сите економии го имаат направено тоа и сега ќе мора оваа Влада тоа да го направи.
- За жал со неразумните трошења на претходната Влада не успеавме тоа да го постигнеме. Она кое што исто така сакам да го кажам, а охрабрува, а кое што го слушнав денеска на состанокот со претставници од Светска банка е дека тие во позитива ја коригираат проекцијата за раст на македонската економија, од 2,8 на 3 отсто, што не е доволно, бидејќи ние мислиме дека според нашите проекции ќе биде 3,5 и погоре, 3,7 зошто да не и 4 отсто, изјави Мицкоски.
Премиерот Христијан Мицкоски денеска истакна дека растот од 9,4 отсто на индустриското производство во мај, споредено со мај минатата година и раст на 9 отсто на преработувачката индустрија во мај е нешто коешто навистина е многу важно за македонската економија
Тој нагласи дека ако се се земе периодот од почетокот на годината заклучно со мај месец, значи првите пет месеци споредено со истиот период лани, растот е 3,3 отсто, а кај преработувачката индустрија 4,5 отсто.
-Така што можам слободно да заклучам дека периодот на консолидирање и стабилизација е завршен, сега почнуваме преку овие индикатори да генерираме раст. Туризмот расте со повеќе од 20 отсто и расте индустриското производство, растат инвестициите и така натаму. Ценам дека вториот квартал, би требало да имаме исклучително висок раст на македонската економија, рече Мицкоски.