Бизнис
Голем интерес за добивање на златна виза за Унгарија
20.06.2025
За една година, апликации за златна виза поднесоа околу двесте кандидати од Кина, Виетнам, Јужна Африка, Индија, Турција и неколку други азиски земји.
Помина една година откако Унгарија ја започна програмата „Златна виза“, според која им нуди на богатите граѓани на земји надвор од ЕУ и ЕЕА дозвола за престој и безвизен пристап до Шенген зоната. Минималниот износ за користење на оваа бенефиција е инвестиција од 250.000 евра, што е најмалиот износ во Европската Унија. На овој начин, на странците од третиот свет им се одобрува привремен престој, по што можат да добијат дозвола за постојан престој и унгарско државјанство без поголеми проблеми.
Во Унгарија постојат три опции за оние кои имаат доволно пари за да аплицираат за програмата. Една можност е да се инвестираат најмалку 250.000 евра во фондови за недвижности.
Друга опција е да се купи недвижен имот во вредност од најмалку половина милион евра, а третата е да се донира најмалку еден милион евра на унгарска високообразовна институција управувана од фонд од јавен интерес.
Во меѓувреме, унгарскиот парламент донесе закон според кој локалните самоуправи се овластени да одлучуваат кој ќе може да купува недвижен имот на нивна територија. Според проценката на владата, поради зголемената побарувачка, дошло до голем скок на цените на куќите и становите во некои атрактивни области, што ги направило тешко достапни за унгарските граѓани.
Неколку европски земји имаат слични програми за привлекување странски инвеститори и внесување дополнителни пари во своите буџети. Најголемиот износ што заинтересираните страни мора да го инвестираат во земјата домаќин е 500.000 евра во Шпанија, додека на Кипар е 300.000 евра, пишува Политика.
фото freepic