Бизнис
ВО КИНА СЕ ЗГОЛЕМУВА ПОБАРУВАЧКАТА ЗА ПЛАТИНА. ЗОШТО?
14.06.2025
Високите цени на златото ги принудуваат многумина од инвеститорите да се насочат кон поевтини алтернативи како што е платината, чија цена е зголемана за 46 проценти од почетокот на оваа година. Нејзината цена на светскиот пазар во средината на оваа недела достигна износ од 1.272 долари за унца, што е највисок износ од февруари 2021 година. Златото вчера се тргуваше за 3.430 долари , што е помалку од рекордните 3.500 долари за унца во април.
Побарувачката за платина особено се зголеми во Кина, која во април увезе 11,5 тони платина, што е најголемо количество во последната година. Светскиот совет за инвестиции во платина (WPIC) очекува глобалната побарувачка за накит изработен од овој скапоцениот метал годинава да се зголеми за пет проценти. Сепак, експертите од Банката на Америка предупредија дека зголемувањето на глобалната побарувачка од само еден процент би можело да го удвои дефицитот на овој скапоцен метал.
За разлика од златото, платината е сè повеќе барана во индустријата. Таа има важна улога во автомобилската индустрија и се користи за производство на конвертори на издувни гасови на дизел возила. WPIC проценува дека овој сектор учествувал помеѓу 29 и 42 проценти во глобалната побарувачка за платина во последните години.
Овој скапоцен метал е потребен во хемиската и електронската индустрија, како и за електролиза во производството на зелен водород. Експертите веруваат дека водородната економија ќе биде една од главните причини за долгорочното зголемување на побарувачката за платина, пренесува Сеебиз.
фото freepic