Бизнис
ГЕРМАНСКИТЕ ТУРИСТИ НА ОДМОР ТРОШАТ ПО 1.500 ЕВРА, НО НАЈМНОГУ „ЗАШТЕДУВААТ“ КОГА СЕ ВО МАКЕДОНИЈА И АЛБАНИЈА ?
14.06.2025
За германските туристи одморите во многу европски земји се поевтини отколку да бидат дома. Според неодамна објавените податоци од Германскиот федерален завод за статистика, најниските нивоа на цени во март се забележани во Албанија и Македонија. Во овие две земји, во просек нивото на цените за посети на угостителски објекти и престој во хотели било за 52 проценти пониско отколку во Германија. За Германците престојувањето во Бугарија е исто така евтина дестинација со цени пониски за 51 процент од германските.
Според најновите податоци од Федералниот завод за статистика, за германските граѓани во март било поевтино отколку дома: во Црна Гора (за -42 проценти), Португалија (-35 проценти), Турција (-31 процент) и Малта (-30 проценти), во Шпанија (-25 проценти), Грција (-22 проценти) и Кипар (-21 процент) и Хрватска (-14 проценти).
Од јужноевропските туристички дестинации, Италија е најскапа, но сепак е 6 проценти поевтина за Германците отколку кога ќе одлучат да одат на одмор во својата татковина.
Во Австрија, пак, трошоците беа исти како и во Германија. Спротивно на тоа, во Холандија германските туристи плаќаат седум проценти повеќе, во Луксембург девет проценти, а во Белгија единаесет проценти повеќе. Во Данска, туристичките услуги беа 28 проценти поскапи отколку во Германија, а рекордер е Швајцарија со 52 проценти.
Сепак, повеќето германските туристи одлучуваат да одат на одмор во својата татковина. Според последната анализа на германскиот туризам, речиси една третина од испитаниците (29 проценти) планираат одмор во својата земја. Според анализата на германскиот туризам, две третини од германското население планира барем едно патување оваа година. Само 13 проценти од испитаниците сакаат повторно да го посетат истото место.
Во анализата исто така се наведува дека Германците потрошиле просечно 1.544 евра по лице на нивниот главен одмор минатата година. Испитаниците потрошиле најмногу пари за одмори во Шпанија (1.843 евра) и Скандинавија (1.728 евра), а најмалку за одмори во земјите од Бенелукс (1.006 евра), Австрија (1.176 евра) и Хрватска (1.314 евра). Просечните дневни трошоци за туристички патувања се намалија за седум евра во споредба со претходната година и сега изнесуваат 122 евра, пренесува Пословни дневник.