Бизнис
ЗЕМЈОДЕЛСКИТЕ ПРОИЗВОДИ ВО ЕУ ПОСКАПЕЛЕ ЗА „СКРОМНИ“ 2,6 ПРОЦЕНТИ, најголемо намалување кај маслиновото масло
12.06.2025
Цените на земјоделските производи во Европската Унија се зголемија за 2,6 проценти во првиот квартал од оваа година, а најмногу поскапеа млекото, јајцата и житарките, објави Евростат. Цената на маслиновото масло се намали за повеќе од 40 проценти.
Од главните земјоделски производи, цените на млекото се зголемиле за 12,6 проценти, јајцата (10,7 проценти) и житарките (9,6 проценти), во споредба со првиот квартал од 2024 година.
Зголемувањето на цените на земјоделските производи е забележано во 23 земји-членки на ЕУ. Највисок раст на цените има во Ирска (19,3 проценти), Луксембург (15,6 проценти) и Унгарија (14,6 проценти).
Цените се намалиле само во Шпанија, за 9,7 проценти, Грција (7,1 процент), Португалија (2,8 проценти) и Малта (два проценти).
Растот на цените на земјоделските инпути, како што се енергијата, ѓубривата или храната за животни, изнесуваше 0,2 проценти, а беше забележан во 14 земји-членки.
Ветеринарните трошоци се зголемија за три проценти, ѓубривата за 0,9 проценти, а енергијата за 0,7 проценти.
Најголем пораст на цената на земјоделските инпути во првите три месеци од оваа година во споредба со истиот период минатата година е забележан во Унгарија (6,8 проценти), Холандија (6,2 проценти) и Романија (5,8 проценти), пренесува Н1.