Бизнис
КОМОРАТА НА ГЕОДЕТИ НУДИ ДИГИТАЛНИ, ИНОВАТИВНИ РЕШЕНИЈА И АТРАКТИВНА ПРОФЕСИЈА ЗА ЗАДРЖУВАЊЕ НА МЛАДИТЕ ДОМА ЗА СЛЕДНИВЕ ЧЕТИРИ ГОДИНИ (2025 – 2029 г.)
Економија и бизнис | печатено издание | 15 мај 2025г.
Никола Рибароски, претседател на Комората на друштва за геодетски работи
Комората на геодети започнува нови четири години со староновото раководство и со Програма за работа (за периодот 2025 − 2029 г.) која претставува надградба и проширување на сето досега сработено со развојна компонента која предвидува, пред сè, заштита, но и поддршка на приватните геодетски компании.
Примарни цели на Програмата се:
– Иницијатива за изработка на целосно нови предлози − законски решенија со ресурси на Комората бидејќи актуелните се застарени и не одговараат на новите времиња и на новите предизвици што доаѓаат со развојот на техниката и на технологијата како клучни во изнаоѓање решенија на главните проблеми во дејноста, кои се должат на лошите политики во овој сектор долги години наназад.
– Итно донесување сеопфатна краткорочна и долгорочна стратегија, но исклучиво со учество на бизнис-секторот, а не изработена од страна на државата без никаква консултација со приватниот сектор.
– Реформи во постојниот катастарски систем со акцент на дигитализацијата и целосно укинување на хартиениот облик на главните производи – геодетски елаборати, односно нивната изработка и дистрибуција да биде целосно електронска.
– Поголема промоција на правата на сопствениците и обнова на премерот за катастарски потреби, 3Д-катастар, масовна проценка на недвижности, примена на БИМ-технологија и консолидација на земјоделското земјиште и на урбаното земјиште.
– Поддршка и едукација на млади стручни лица со цел задржување на атрактивноста на професијата за да ги задржиме младите во земјава и да придонесеме за намалување на процесот на иселување на младите.
– Продлабочување и проширување на воспоставените соработки со Комората на овластени архитекти и овластени инженери и неколку други домашни организации и здруженија, како и со неколку сродни комори и здруженија пред сè од Србија, од Р Српска, од Косово, од Бугарија, од Хрватска и др.
Секако програмата предвидува конкретен план − да се возобнови или да се воспостави нова соработка со Агенцијата за катастар на недвижности и како да се надминат недоразбирањето и непосакуваните ситуации предизвикани од мешањето во независноста на Комората. Иако беше упатена покана за присуство на Собранието на Комората, директорот не се појави. Агенцијата не почитува судски одлуки, одлуки на Централниот регистар.
Во секој случај Комората ќе дејствува во позитивна насока со цел воспоставување комуникација и соработка меѓу двете најсродни институции (Комората и Агенцијата), а искрено се надеваме дека ваквата инцијатива ќе биде препознаена од надлежните државни институции.
Никола Рибароски е реизбран за претседател на Комората на друштва за геодетски работи на редовното Годишно собрание, беше избран и староновиот состав на УО, а беа доделени и признанија за посебна заслуга во унапредување на професијата и на геодетската дејност на Гордан Бошковски од Прилеп, прв претседател на Комората, и на Драган Петрески од Скопје.