Бизнис
ПОГЛЕД КОН ИДНИНАТА – КИРИЛ КОРОВЕШОВСКИ
03.06.2025г
Кирил Коровешоски, извршен директор на GS1 Македонија
ГС1-организацијата е дел од секојдневниот живот, од начинот на кој работат компаниите и најважно од сè − функционира секогаш беспрекорно и очекувано. Никој не би очекувал неколку линии со бели празнини меѓу нив да бидат основата на која можат да комуницираат и да соработуваат компаниите од целиот свет зборувајќи заеднички глобален јазик – јазикот на стандардите.
Живеејќи во ерата на информатичката револуција и експанзијата на интернетот од алатка за размена на документи меѓу неколку универзитети пред четириесеттина години до најмоќниот систем за поврзување на луѓето, на компаниите, на размената на идеите, на научните проекти и секако наједноставен и најраспространет промотор на бизнисите, ГС1 е секогаш во чекор со секоја револуција во технологијата, во науката и во индустријата при што овозможува воспоставување стандарди врз основа на претходна анализа и соработка со најмоќните компании во светот.
ГС1-глобалната организација и ГС1 Македонија го следат овој тренд и пред неколку години настапи целосна промена на стратешките цели на глобалната и на сите национални организации. Во наредниве 5 години се воспоставени две клучни стратешки цели:
– Дигитализација на податоците за производите.
– Миграција од 1D- во 2D-баркодови до 2027 година.
Дигитализацијата на податоците за производите произлегува од забрзаниот развој на електронската трговија, но и од еволуцијата на просечниот потрошувач на интернет, кој е заинтересиран за разновидни податоци за производот (нутритивни факти, алергени, состојки итн.).
Во изминатиов период беа развиени каталози, односно регистри на податоци насекаде во светот. Во нашава земја беше имплементиран ГС1-каталогот преку кој им се овозможи на компаниите да внесуваат податоци за нивните производи и истите тие податоци да бидат јавно достапни за крајните потрошувачи. Во таа насока беше развиен и посебен модул за активација на баркодовите myGS1 преку кој се овозможи регистрирање на баркодовите со внес на името на брендот и на името на производот.
Кирил Коровешоски, пет години (од 2020 година) е извршен директор на ГС1 Македонија, одговорен е за стратешкото и за оперативното водење на компанијата, за финансиската стабилност и за законитото работење. Во компанијата има и претходно работно искуство од 8 години (од 2012 година) како технички соработник одговорен за развој и за имплементација на софтверски решенија за мали и за средни бизниси со користење на ГС1-стандардите.
Како експерт во сферата на информатичката технологија, своите способности ги развива и ги надградува и како помлад администратор во периодот 2011/2012 година одговорен за лабораториски вежби по предметите Концепти за развој на софтвер и Вовед во интернет на Факултетот за информатички науки и компјутерско инженерство − Скопје.
Освен во сферата на ИТ, Коровешоски покажува одлични способности и во владеење на три исклучително значајни странски јазици (англиски, шпански и италијански) имајќи предвид дека станува збор за земји кои се во врвот на развојот на технолошките и на индустриските процеси.