Бизнис
Бизнисот бара над 70 отсто учество во реализацијата на британските инвестиции
22.05.2025
Бизнисот да биде присутен со најмалку 70 отсто од извршувањето на работите во новите проекти и инвестиции што ќе ги договора Македонија со Обединетото Кралство во рамки на стратешкото партнерство, бара Стопанската комора.
Компаниите се задоволни од работата на Владата иако има мислење дека некои од работите поспоро се одвиваат, изјави претседателот на Комората Бранко Азески по средбата со министерката за финансии Гордана Димитриеска Кочоска.
- Моментно, во оваа исклучително проблематична геополитичка ситуација, мора превентивно да се делува за да одговориме на сите предизвици. Бараме враќање на солидарниот данок, тука мислам на одлуката на Уставниот суд, како и во предизборието повторно да се покрене процесот на децентрализација, истакна Азески.
Во однос на капацитетноста на домашните компании и колку тие се вистински способни да се вклучат во реализацијата на инвестициите, Азески рече дека бизнисот е објективен и реален.
- Не очекуваме да се направат чуда и да имаме повеќе компании од реално што постојат, ќе бидеме задоволни нашите компании да добијат работа, дали ќе бидат 70 или 65 или 55 отсто од работите, да го изработат квалитетно и да имаат можност да конкурираат и на други проекти надвор од Македонија. Сметаме дека градежниот сектор особено во делот на нискоградбата во изминатиот период беше ставен на страна, на тендерите нашите компании освен како подизведувачи не добија некој значаен проект и тоа придонесе да ја намалат својата активност и да не се конкурентни. Со надеваме дека со зголемување на инвестициската активност повторно ќе ја вратат старата активност што ја имаа зашто тоа е битно за да прераснат во регионални играчи, да излезат од земјава и да можат да прават промет и профит на надворешниот пазар, потенцира Азески.