Бизнис
Туристичкиот потенцијал презентиран пред претставници на Јапонската агенција за меѓународна соработка
16.05.2025
Туристичкиот потенцијал и природните убавини на земјава беа презентирани пред претставници на Јапонската агенција за меѓународна соработка (JICA) кои деновиве престојуваат во Охрид.
Директорката на Агенцијата за промоција и поддршка на туризмот (АППТ), Билјана Стефаноска, во статус објавен на нејзиниот фејсбук-профил појаснува дека притоа била остварена посета на Охрид, Струга, Дебрца и Вевчани како дестинации, како што пишува, кои со својата автентичност и природно богатство се идеални примери за одржлив туризам и зелени туристички практики.
„Оваа посета има за цел поттикнување на одржлив развој, поддршка на локалното население, подигање на свеста за заштита на природата и продлабочување на билатералната соработка. Очекуваме нови проекти и заеднички иницијативи кои ќе придонесат за развој на туристички дестинации во согласност со принципите на одржливост“, вели Стефаноска.
Јапонската агенција (ЏАЈКА) е еден од најголемите донатори во Македонија, вклучена во изградбата на хидросистемот „Злетовица“, во повеќе проекти за модернизација на македонското здравство, донаторски проекти, како и оној за ревитализација на Колекторскиот систем за заштита на Охридското Езеро.
Извор/фото МИА