Бизнис
ГЕРМАНСКИТЕ ТУРИСТИ СЕ ВРАЌААТ НА ХРВАТСКОТО ПРИМОРЈЕ
05.05.2025
Во Хрватска, во април беа остварени околу 550 илјади ноќевања од германските туристи, што претставува зголемување за повеќе од 50 проценти во споредба со минатиот април.
Април оваа година ќе биде најдобриот во историјата за хрватскиот туризам кога се во прашање туристите од германскиот пазар. Одлични резултати беа постигнати и во текот на минатиот октомври, што покажува дека овој пазарен сегмент игра важна улога во зголемувањето на сообраќајот во предсезонските и постсезонските периоди. Во однос на состојбата на германскиот пазар, може да се каже дека Хрватска се перцепира исклучително позитивно, како добро позната туристичка дестинација.
Состојбата на продажбата и резервациите варира во зависност од поединечниот туроператор, видот на сместување и периодот од сезоната, но генерално може да се заклучи дека резултатите од продажбата се движат во насока на минатогодишните бројки.
Во првите четири месеци Германците оствариле повеќе од 717 илјади ноќевања, што претставува раст од 10 проценти во споредба со минатата година.
Традиционално, германските гости од јужните германски покраини се најмногу ориентирани кон Северниот Јадран. Нера Миличиќ, директорка на претставништвото на HTZ во Минхен, истакнува дека за време на продолжениот велигденски викенд се постигнати одлични резултати.
Најновото истражување на пазарот покажува дека интересот за патување расте кај Германците, и покрај глобалната економска неизвесност. Сепак, нивниот избор на дестинација и патување е под влијание на привремени фактори како што се движењата на цените, геополитичките вести, времето и економските услови.
Досегашните трендови на продажба покажуваат дека германските гости бараат висок квалитет и сакаат да си дозволат пријатен одмор, но во исто време ќе ги следат трошоците преку навремени резервации, пренесува Сеебиз.
фото freepic