Бизнис
ВО ОВИЕ ЗЕМЈИ Е НАЈИСПЛАТЛИВА ИНВЕСТИЦИЈАТА ВО НЕДВИЖНОСТИ, МАКЕДОНИЈА Е НА ТРЕТО МЕСТО!
04.05.2025
Најдобрите земји за инвестирање во недвижности во Европа во 2025 година се наоѓаат во Централна и Источна Европа. Молдавија е на првото место, според новиот извештај на британската осигурителна компанија „Вилијам Расел“, во кој се земени предвид факторите како што се данокот на имот, данокот на приход од кирија и бруто приходот од кирија.
Во претходното истражување спроведено од компанијата „1st Move International“, Литванија беше најдобриот избор за инвеститорите, а во новиот извештај се рангира на второ место, веднаш зад Молдавија, додека Македонија е на третото место.
Молдавија се издвојува благодарение на својот главен град Кишињев, кој бележи силен развој на инфраструктурата, угостителството и деловниот сектор. Покрај тоа, туризмот е во пораст, особено благодарение на винската индустрија и богатото културно наследство, што отвора можности за краткорочни изнајмувања, објавува „Еуроњуз“.
Литванија, како членка на ЕУ, е привлечна за странските инвеститори бидејќи нема ограничувања за странците при купување недвижен имот. Според Евростат, цените на недвижностите се зголемиле за речиси 10 проценти во последниот квартал од 2024 година во споредба со истиот период од претходната година, а се очекува трендот на раст да продолжи. Кириите значително се зголемија, за повеќе од 170 проценти во споредба со 2015 година.
Според извештајот, Литванија нуди бруто годишен принос од околу 6,39 проценти, со максимални трошоци за купување од 4,10 проценти. Умерената стапка на раст на цените го прави стабилна и профитабилна инвестициска дестинација.
На третото место е Македонија, која е кандидат за членство во ЕУ. Земјата има ниски даноци, едноставна постапка за купување недвижен имот, како и владини стимулации за странските инвеститори. Бруто приносот е околу 6,47 проценти годишно, што укажува на висок принос во однос на вредноста на имотот.
Според истражувањето, Србија и Ирска нудат многу добри стапки на поврат, со бруто годишни износи повисоки од седум проценти.
Земјите со високи бруто приноси и релативно ниски даноци на приходи од изнајмување се Андора, Црна Гора и Бугарија.
Шпанија долго време е една од најатрактивните дестинации за инвестирање во недвижнини во Европа. Аликанте се издвојува особено поради поповолните цени во споредба со другите крајбрежни градови, високата зафатеност на имотите за изнајмување, развиената локална економија и инфраструктура, како и медитеранскиот начин на живот и клима.
Цените на новите куќи во Кина се стабилизираа во март по малите месечни падови во претходните месеци, што укажува на првите знаци на закрепнување во секторот за недвижности, иако побарувачката останува слаба поради големото оптоварување на пазарот од долгот. Во февруари, цените на новите станови се намалија за 0,1 процент во споредба со јануари, додека во март останаа непроменети. Истражувањата покажаа дека инвестициите во комерцијални недвижности во Азиско-пацифичкиот регион се зголемија, објави Бизни.рс.