Бизнис
ВОЗАЧИТЕ НА КАМИОНИ МОРА ДА ЗБОРУВААТ АНГЛИСКИ ЈАЗИК, нова наредба на американскиот претседател Трамп
30.04.2025
Претседателот на Соединетите Американски Држави, Доналд Трамп, издаде извршна наредба со која се пропишува дека возачите на камиони во Соединетите Американски Држави мора да зборуваат англиски јазик за да се обезбеди безбедноста на американските семејства на автопатите.
Наредбата потпишана од Трамп која е испратена до американскиот министер за транспорт Шон Дафи, се однесува на тоа дека треба „да ги повлече олеснувањата која се однесуваше на законската одредба за задолжително познавање на англискиот јазик за возачите на комерцијални возила“, објави Ројтерс.
Со спроведување на новите упатства се предвидува возачите да мора да положат тестови по англиски јазик.
„Претседателот Трамп верува дека англискиот јазик е задолжителен безбедносен услов за професионалните возачи. Тие треба да бидат способни да читаат и разбираат сообраќајни знаци, да комуницираат со сообраќајните полицајци, агентите на граничната патрола, агентите на земјоделските контролни пунктови и друг контролен персонал, како и да даваат и добиваат повратни информации и упатства на англиски јазик“, се наведува во образложението на извршната наредба на Трамп.
Портпаролката на Белата куќа, Каролин Левит, на брифинг за медиумите во понеделник изјави дека возачите на камиони кои не зборуваат англиски „претставуваат огромен проблем во заедницата на професионални возачи“.
Според неа, возачите на камиони кои не можат да го положат тестот по англиски јазик ќе бидат ослободени од услуга, што ќе ја зголеми безбедноста на патиштата, пренесува Блиц.