Бизнис
ЗНАЧЕЊЕТО НА ЕЕН-ПРОЕКТОТ ЗА МАКЕДОНСКИТЕ КОМПАНИИ − за зголемувањето на капацитетите и за конкурентноста на компаниите
ПРОЕКТНИ АКТИВНОСТИ НА КОМОРАТА
Економија и бизнис | печатено издание | 01 април 2025г.
Стопанската комора на Македонија, како значајна бизнис-институција, претставник на приватниот сектор во Македонија, во континуитет дејствува преку Европската мрежа на претпријатија (Enterprise Europe Network) − EEН-проектот, со давање поддршка и информации за деловни и за правни услуги, за прашања поврзани за ЕУ-регулативата и со прописите, информации и совети за европските стандарди, промовирање нови технологии, иновативни производи, услуги или техничка експертиза, како и побрз пристап до информации кои ги користат земјите на Европската Унија, а со цел подигање на конкурентноста и на иновативноста на компаниите.
ЕЕН-платформата (https://een.ec.europa.eu/) ја претставува најголемата европска мрежа во светот, која овозможува директна интеракција меѓу компаниите и бизнис-советниците од ЕУ-земјите, кои обезбедуваат и споделуваат персонализирани услуги за интернационализација, пристап до финансирање и комерцијализација на иновациите, пристап до пазарите во над 60 земји во Европа, пошироко вклучувајќи ги САД, Јапонија, Русија, Кина, Северна Африка и земјите од Блискиот Исток.
Европската мрежа на претпријатија (Enterprise Europe Network) − EEН-проектот − треба да се користи од страна на компаниите од аспект на развој и на јакнење на конкурентноста на приватниот сектор зашто преку овој проект компаниите ќе добиваат податоци кои се неопходни за: развој на иновативноста, истражувањето, технолошки напредок на компаниите, создавање иновативни производи, услуги и решенија кои ќе значат јакнење на европската и на македонската економија. Сите овие услуги и информации, исто така, може да се користат и од страна на универзитети, на институти за истражување, на центри за технологии и на агенции за развој на иновации. Овие услуги се бесплатни и се достапни преку Комората во рамките на оваа бизнис-мрежа.
Зголемувањето на капацитетите и на конкурентноста на компаниите е еден од главните приоритети на Стопанската комора на Македонија и во таа насока се реализираат активности во конзорциум со уште две партнерски организации, Универзитетот „Св. Кирил и Методиј“ и Фондацијата за менаџмент и индустриско истражување од Скопје, под името на проектот „Европска мрежа на претприемништво на Северна Македонија − ЕЕНОМА“ (Enterprise Europe Network North Macedonia - EENOMA [https://www.een.mk]), што овозможува креирање алатки и услуги кои ќе ги поттикнат растот, иновативноста, извозните капацитети и конкурентноста на компаниите.
Можностите за македонските компании да најдат странски партнери преку европската мрежа на бизнис-можности − Европската мрежа на претпријатија (Enterprise Europe Network) − е огромна. Повеќе од 250 000 мали и средни компании годишно, во просек, на ниво на ЕЕН-мрежата добиваат некаков вид услуга од странските партнерски организации при што просечно околу 54 000 мали и средни претпријатија добиваат совети од експертите во мрежата во насока на унапредување на нивната иновативност, раст и интернационализација, додека повеќе од 20 000 претпријатија преку мрежата учествуваат на меѓународни настани, на форуми, на годишни и на регионални конференции.
Стопанската комора на Северна Mакедонија (како членка на Европската мрежа за претприемништво), во соработка со Стопанската комора на Србија и со Генералниот директорат на Европската комисија за проширување и источно соседство (DG ENEST), и Европската мрежа за претприемништво ќе бидат и дел од регионалниот деловен настан „Отворени за бизнис: зајакнување“ (Open4Business: Empowering) на ЕУ (зајакнување на микро, на малите и на средните претпријатија [ММСП] во Западен Балкан – патеки кон Европската Унија), кој се одржува на 9 април 2025 година во Белград, Србија, во Хотел „Метропол Палас“.
Целта на настанот е да се поттикнат инвестициите на земјите во Западен Балкан преку информирање, поврзување и размена на информации:
1. Информирање на микро, на мали и на средни претпријатија (ММСП) за можностите за финансирање со поддршка на Инвестициската рамка за Западен Балкан (ВБИФ [WBIF]);
2. Поврзување на компании од Западен Балкан, од Европската Унија и на финансиски институции;
3. Размена на информации меѓу компании од регионот на Западен Балкан и компании од ЕУ, на јавните институции за политиките и за предизвиците во бизнисот.
Организацијата на настанот има цел преку две панел-дискусии да потикне дискусии за „ВБИФ-програмите и поттикнување инвестиции од европски компании“ и „можности за деловно вмрежување (matchmaking)“.
Регионалниот деловен настан „Отворени за бизнис: зајакнување“ ќе овозможи компаниите и учесниците да се запознаат со поддршката на ВБИФ во форма на заеми, на капитал, на техничка помош и на советодавни услуги достапни преку финансиските институции. Финансиските институции и компании ќе споделуваат практични искуства, а претставници на стопанските комори ќе зборуваат за можностите и за предизвиците за интеграција во регионалните и во европските синџири на вредности.
Во вториот дел од настанот ќе се одржат средби со претставници на компании од Западен Балкан, од Европската Унија, како и со претставници на финансиски институции и на стопански комори.
Настанот го опфаќа регионот на Западен Балкан, т. е. Албанија, Босна и Херцеговина, Косово, Црна Гора, Северна Македонија и Србија.