Бизнис
НАМАЛУВАЊЕ НА ПРОДАЖБАТА НА АВТОМОБИЛИ НА ЕВРОПСКИОТ ПАЗАР
24.04.2025
Европскиот пазар на автомобили забележа намалување на продажбата во првиот квартал од 2025 година, додека електричните возила продолжуваат да го зголемуваат учеството на пазарот. Според официјалните податоци објавени од Здружението на европски производители на автомобили (ACEA), вкупно 2.715.008 нови автомобили се регистрирани низ Европската Унија во првите три месеци од 2025 година, што претставува намалување од 1,9 отсто во споредба со истиот период од минатата година.
Во март годинава бројот на новите регистрации се намали за 0,2 отсто на годишно ниво, што е значително подобрување во однос на падот од 3,4 отсто во февруари и падот од 2,6 отсто во јануари. Во март се регистрирани вкупно 1.029.519 нови возила.
Хибридните електрични возила (HEV) зазедоа рекордни 35,5 отсто од вкупниот пазар на нови автомобили во ЕУ.
Автомобилите со бензински мотори се на второ место со пазарно учество од 28,7 отсто, додека возилата на батерии (BEV) достигнаа учество од 15,2 отсто. Дизел возилата, кои некогаш доминираа на европските патишта, учествуваат со 9,5 отсто од новите регистрации.
Растот на регистрациите на електрични возила на батерии изнесува 23,9 отсто на годишна основа, со вкупно 412.997 регистрирани нови електрични возила. Овој раст првенствено беше поттикнат од значителното зголемување на продажбата во Германија (38,9 отсто), Белгија (29,9 отсто) и Холандија (7,9 отсто), а Франција забележа пад од 6,6 отсто.
Регистрациите на хибридните електрични возила во првиот квартал од 2025 година, се зголемија за 20,7 отсто во споредба со истиот период од претходната година, достигнувајќи 964.108 единици. Франција е на врвот со зголемување од дури 47,5 отсто, следува Шпанија со раст од 36,6 отсто и Италија со зголемување од 15,3 отсто. Германија забележа зголемување од 10,5 отсто во продажбата на хибридни возила, пренесува Телеграф.