Бизнис
ПРОШИРУВАЊЕ НА ПАТАРИНАТА КАЈ МИЛАДИНОВЦИ
23.04.2025
Предвидено е проширување на патарината кај Миладиновци и зголемување на процентот на поминувања за електронска наплата на патарините (таг), најави денеска директорот на Јавното претпријатие за државни патишта (ЈПДП) Коце Трајановски при посетата на Куманово каде почна рехабилитација на регионален пат.
- Ќе се прави уште една лента од десната страна и со тоа да се зголеми проточноста, тоа е една од најтесните грла на патарините во Македонија и се надевам дека за неколку месеци ќе биде решено. Подготвуваме нова одлука со којашто ќе гледаме да имаме што повеќе поминувања на патарините со тагови. Ако сега имаме 35.000 тагови планираме да имаме од 200 до 300.000 тагови слично како што е во Србија. А и тие да важат и во Србија, Грција, Хрватска. Искрено, се надевам дека до лето тоа ќе го направиме, изјави Трајановски.
Трајановски посочи дека се подготвува петгодишна програма за реконструкција на автопатиштата и експресните патишта, меѓу нив и за реконструкција на автопатот Куманово-Скопје, како и на патот помеѓу Хиподром, Петровец и Миладиновци. Годинава, почнува и изработката на петгодишната програма за реконструкција на автопатишта, регионални, експресни патишта преку која ќе бидат утврдени приоритетите.
Извор МИА