Бизнис
Значително намалување на холандски и полски гости за летната сезона во Охрид!
16.04.2025
Претстојните велигденски празници и продолжениот викенд ќе ја наполнат охридско-струшката ривиера. Исполнетоста на хотелските капацитети се очекува да биде 60 до 70 отсто, а голема е исполнетоста и во приватните сместувања, како и викенд становите.
Поклопувањето на православниот и католичкиот Велигден ќе ги врати и печалбарите во своите огништа, што значително ќе ја зголеми фрекфенцијата на движење во двата крајезерски града.
Според првиот човек на Асоцијацијата на хотелиери на Македонија Крсте Блажески, најмногу резервации имаат од соседството, гости, кои редовно ја посетуваат ривиерата за Велигден.
- Не можеме да кажеме дека се ќе биде максимално исполнето. Очекуваме 60 до 70 отсто исполнетост за Велигденските празници, изјави Блажески за МИА.
За претстојната летна туристичка сезона забележа дека има значително намалување на холандски и полски гости, но за сметка на тоа зголемен е бројот на туристи од Турција, а се поголем е интересот кај грчките туристи, кои го посетуваат регионот најчесто во пролетните денови.
- Генерално ако сме на ниво на минатата година ќе бидеме задоволни. Очекувањата за исполнетост во хотелскиот сектор се како лани, истакна Блажески.
Извор/фото МИА