Бизнис
ОРБАН ГИ ОБВИНИ СТРАНСКИТЕ ТРГОВСКИ КОМПАНИИ ЗА ВИСОКАТА ИНФЛАЦИЈА!
09.04.2025
Инфлацијата повторно порасна во Унгарија, достигнувајќи 5,7 отсто во февруари, што е највисока од 27-те членки на Европската Унија. Потрошувачките цени низ ЕУ се зголемија во просек за 2,7 отсто.
Со цел да ги смири Унгарците поради зголемената инфлација, премиерот Виктор Орбан воведе контрола на цените на основните прехранбени производи во супермаркетите. Со ограничување на маржите со 10 отсто на 30 основни прехранбени производи, унгарскиот премиер повторно ја започна својата борба против странските трговци.
Економистите проценуваат дека оваа мерка може да донесе краткорочно олеснување за потрошувачите, но не значи многу за жителите од руралните средини кои се далеку од супермаркетите.
По стапувањето на сила на мерките, Орбан ги обвини странските трговци дека ги „ограбуваат Унгарците“ со нивните „прекумерни и неоправдани зголемувања на цените“.
Наведувајќи маржи од 42 отсто на пилешки крилца или 70 отсто на јогурти, Орбан рече дека „итната интервенција“ е дизајнирана да ги заузда трговците кои „се грижат само за профитот“.
Минатата година австрискиот синџир супермаркети ја обвини унгарската влада за дискриминација на странски компании, а Врховниот суд на ЕУ пресуди во негова корист во посебен случај.
Здружението на унгарските трговци, кое претставува многу од водечките трговци во земјата, ги отфрли обвинувањата на владата за профитерство.Тие велат дека профитот се намалува или се претвора во загуби, при што мултинационалните компании мора да плаќаат данок, за разлика од нивните помали унгарски ривали.
Орбан наметна слични ограничувања на цените во 2022 и 2023 година, кога инфлацијата скокна до 26 отсто.
Според Евростат, Унгарија, заедно со Бугарија, е на последното место според потрошувачката на домаќинствата во ЕУ во 2023 година, пренесува Сеебиз.
фото freepic