Бизнис
УНГАРИЈА СО НАЈВИСОК РАСТ ЦЕНИТЕ НА СТАНОВИТЕ ВО ЕУ
08.04.2025
Цените на становите во Европската Унија се зголемени за 4,9 отсто на годишно ниво во четвртиот квартал од 2024 година, а кириите за 3,2 отсто, објави денеска Евростат.
Во однос на третиот квартал од 2024 година, цените на становите се зголемени за 0,8 отсто, а на кириите за 0,6 отсто.
Во периодот од 2010 година до четвртиот квартал од 2024 година, цените на становите во ЕУ се зголемени за вкупно 55,4 отсто, а кириите за 26,7 отсто.
Во наведениот период кириите постојано се зголемувале, додека цените на становите следеле попроменлив тренд.
Од 2010 година до четвртиот квартал од 2024 година, најголем скок на цените на становите е забележан во Унгарија од 234 отсто и во Естонија од 228 отсто.
Цените на становите се зголемени повеќе од двојно во Литванија 187 отсто, Чешка 142 отсто, Португалија 120 отсто, Бугарија 115 отсто, Австрија 112 отсто, Луксембург 105 отсто.
Во Кипар цените на куќите останаа на исто ниво како во 2010 година, а Италија беше единствената земја каде што цените на становите се намалија за четири отсто.
Цените на изнајмувањето на недвижностите во Европската Унија продолжија да растат во текот на четвртиот квартал од 2024 година, забележувајќи просечен годишен раст од 3,2%. Меѓу земјите со најизразен скок е Естонија, каде цените на изнајмувањето се зголемени за повеќе од 200% во однос на 2010 година, покажуваат најновите податоци на Евростат.
Во периодот од 2010 година до крајот на 2024 година, цените за изнајмување во ЕУ се зголемени за вкупно 26,7%.
Грција е единствената земја-членка на ЕУ каде што цените на изнајмувањето паднаа за 13% во истиот период, што укажува на специфични економски и демографски фактори кои влијаат на локалните пазари.
Зголемените цени за изнајмување стануваат се поголем предизвик за населението ширум ЕУ, а податоците на Еуростат ја нагласуваат потребата од долгорочни и одржливи политики за домување кои ќе обезбедат пристапен простор за живеење за сите граѓани, без оглед на динамиката на пазарот, пренесува Бизлаив.