Бизнис
ШПАНИЈА ЈА „ТРЕСЕ“ СТАНБЕНА КРИЗА, ШПАНЦИТЕ ПРОТЕСТИРААТ ПОРАДИ ВИСОКИТЕ ЦЕНИ ЗА ДОМУВАЊЕ
07.04.2025
Шпанските граѓани вчера масовно протестираа во 40 градови низ земјата поради високите трошоци за сместување и изнајмување станови, како и поради немањето станови. Најголемиот марш поради високите трошоци за домување се одржа во Мадрид под слоганот „Стави крај на станбениот бизнис“, што се одржа во организација на синдикалните организации, пренесува шпанскиот јавен сервис RTVE.
Организаторите повикаа на штрајк на станарите и апелираа до половина милион луѓе на кои годинава им истекуваат договорите за кирија, да не се согласат со високите цени и да останат во становите што ги изнајмиле.
Учесниците на маршот во Мадрид носеа транспаренти против краткорочно изнајмување станови, објави АП.
Во Шпанија годишно се градат околу 120.000 нови станови, за шест пати помалку отколку пред 2008 година. Станбената криза особено тешко ја погоди Шпанија, каде што има традиција на сопственост на домови и недостаток на станови за изнајмување. Кириите се зголемени поради зголемената побарувачка за станови.
Купувањето куќа стана незамисливо за многумина Шпанци, особено во големите градови и крајбрежните области.
Во 2024 година Шпанија прими рекордни 94 милиони туристи, со што стана втора најпосетувана земја во светот, а во исто време беше забележан и прилив од илјадници мигранти. Двата фактори придонесуваат за зголемување на станбениот дефицит од 500.000 домови, објави Банката на Шпанија.
Младите велат дека мораат да останат со своите родители или да трошат многу за да ги споделат трошоците за изнајмување стан со некого, со мали шанси да заштедат доволно за еден ден да купат дом.
Просечната кирија во Шпанија е речиси двојно зголемена во последните 10 години. Цената на метар квадратен се зголеми од 7,2 евра во 2014 година на 13 евра минатата година, а кириите се уште поскапи во Мадрид и Барселона, пренесува Б92.