Бизнис
АМЕРИКАНЦИТЕ СЕ ПОМАЛКУ РАСПОЛОЖЕНИ ЗА ТРОШЕЊЕ
14.03.2025
Расположението на американските потрошувачи нагло опаѓа поради стравувањата од трговска војна, се вели во студијата објавена денеска од Универзитетот во Мичиген.
Вредноста на индексот што го мери расположението на потрошувачите во САД за март падна за 10,5 отсто месечно на 57,9 поени, според прелиминарните податоци, и сега е на најниско ниво од ноември 2022 година.
На годишно ниво, расположението на потрошувачите се намали за 27,1 отсто во споредба со истиот месец лани.
Директорот за истражување Џоан Хсу рече дека трендот на намалување на расположението е присутен кај сите категории на потрошувачи, без оглед на возраста, образованието, приходот, богатството, политичката припадност и географската област.
- Очекувањата за иднината се влошија во повеќе економски категории, вклучувајќи ги личните финансии, пазарите на труд, инфлацијата, деловните услови и пазарите на капитал, додаде Хсу.
Според неа, на потрошувачите им пречи високиот степен на неизвесност околу политиката и другите економски фактори и им го отежнуваат правењето планови за иднината, пренесува Еуроњуз.