Бизнис
ЦЕНИТЕ НА НАФТАТА ПАЃААТ, ЕКОНОМСКА НЕИЗВЕСНОСТ ВО САД И СВЕТОТ
10.03.2025
На глобалните пазари минатата недела цената на нафтата падна трет пат по ред, бидејќи трговците стравуваат од слабеење на побарувачката поради забавувањето на растот во најголемите светски економии и трговската војна.
Цената на барелот на лондонскиот пазар минатата недела падна за 3,8 отсто, на 70,36 долари, додека на американскиот пазар барелот поевтини за 3,9 отсто, на 67,04 долари.
Падот на цената на нафтата трета недела по ред најмногу се должи на неизвесноста во однос на трговската политика на американскиот претседател Доналд Трамп.
Трговците се загрижени и за знаците на послаба американска побарувачка бидејќи растот на најголемата светска економија забавува. Како резултат на тоа, залихите на нафта во САД се зголемија за 3,6 милиони барели минатата недела, повеќе од очекуваното.
Ниту другите најголеми светски економии не се во одлична форма. И покрај ова, Организацијата на земјите извознички на нафта (ОПЕК) и нејзините сојузници во понеделникот ја потврдија претходната одлука за зголемување на производството од април, пренесува „Индекс“.