Бизнис
ПРОИЗВОДСТВОТО НА МЛЕКО ВО ЕУ СЕ НАМАЛУВА ПОРАДИ НЕКОЛКУ ФАКТОРИ
04.03.2025
Производството на млеко во Европската Унија во 2025 година се предвидува да се намалува поради неколку фактори, вклучувајќи го и намалениот број на крави, еколошките регулативи, ниските приходи на фармерите и појавата на болести.
Според извештајот на Глобалната земјоделска информативна мрежа (GAIN), помалото производство делумно ќе биде компензирано со намалената потрошувачка на свежо млеко.
Производството на сирење се предвидува да расте во 2025 година, додека производството на путер и млеко во прав ќе се намали.
Според прогнозите, вкупните испораки на млеко во ЕУ ќе изнесуваат 149,4 милиони тони, што е за 0,2 отсто помалку од ревидираните проценки за 2024 година. Бројот на молзни крави се очекува годинава да продолжи да опаѓа.
Млечната индустрија на ЕУ се соочува со предизвици поради спроведувањето на новата Заедничка земјоделска политика (ЗЗП) и Зелениот договор.
Многу земјоделци се загрижени за еколошките прописи кои, според нив, негативно ќе влијаат на профитабилноста на ова производство.
фото freepic