Бизнис
ВИСОКИТЕ ЦЕНИ ГЛАВНА ПРЕЧКА ЗА КУПУВАЊЕ НА ЕЛЕКТРИЧНИ АВТОМОБИЛИ ВО ГЕРМАНИЈА
03.03.2025
Високите цени се главната причина зошто германските потрошувачи се двоумат да се префрлат на електрични возила, покажува најновото истражување нарачано од ДПА.
Студијата спроведена од истражувачкиот институт YouGov покажа дека 47 отсто од испитаниците ги навеле прекумерните трошоци како главна пречка за купување на електрични возила.
Други главни фактори го вклучуваат ограничениот опсег на возила на батерии, што е проблем за 42 отсто од испитаниците и недостатокот на станици за полнење за околу 40 отсто од испитаниците. Околу 30 отсто од испитаниците биле одвратени од високите цени на електричната енергија, додека 24 отсто изразиле загриженост дека технологијата сè уште не е целосно развиена, пишува „Сеебиз“.
Во текот на изминатата година по истекувањето на владините субвенции продажбата на електрични возила падна за 27 отсто во Германија .
Само 12 отсто од испитаниците изјавиле дека би биле подготвени да платат повеќе од 30.000 евра за електрично возило. Сепак, и покрај зголемената конкуренција од Кина, евтините електрични автомобили остануваат реткост во Германија, а клубот на возачи ADAC наведе само шест модели на е-автомобили на продажба кои чинат под 30.000 евра.