Бизнис
НАМАЛУВАЊЕ НА ЦЕНАТА НА ЛЕБОТ НА 20 ДЕНАРИ, бараат од Асоцијацијата на земјоделци и фармери
21.02.2025
Цената на лебот да се намали на 20 денари, да се зголемат субвенциите за производството на пченица и за 50 проценти да се намалат заштитните средства зашто се меѓу најскапите во регионот, бараат од Асоцијацијата на земјоделци и фармери. При ниска цена на пченицата од 9 до 11 денари, висока е цената на лебот од 30 до 35 денари за една векна со различна тежина.
- Според откупната цена на пченицата која беше од 9 до 11 денари за килограм, реално е цената на лебот да биде 20 денари. Тоа значи дека ние, како Асоцијација, имаме направено прецизна калкулација во која не треба лебот да биде повеќе од 20 денари. Предлагаме, сите млинари и пекарници да ја прифатат оваа наша калкулација и уште веднаш и цената на лебот да биде 20 денари, изјави Перо Стојкоски, претседател на Асоцијацијата на земјоделци и фармери.
Потребите на земјава од пченица се околу 360 000 тони, а производството, според асоцијацијата е околу 230 000 до 240 000 тони. Другото се увезува од соседните земји.
Според Александар Ристески, производител на леб од Прилеп, сегашната цена на лебот е реална и прифатлива, од 30 до 35 денари.
- Сметам дека сегашната цена е реална. Пред 10-15 години, цената на лебот беше 25 денари. Сега, продажната цена на лебот е 30 денари. Кога ќе направиме споредба на ресурсите, на репроматеријалите, на струјата, на работната рака, а пред 10-15 години, па и сега, па макар и на брашно, мислам оваа цена е прифатлива за потрошувачите, рече Ристески.
Извор МИА
фото freepic