Бизнис
МЕЛНИЧАРИТЕ БАРААТ ДА СЕ УКИНАТ ОГРАНИЧЕНИТЕ ЦЕНИ НА БРАШНОТО ВО СРБИЈА
19.02.2025
Деловното здружение „Житоунија“ побара од Владата на Србија да ја укине Регулативата за ограничени цени на брашното. Или алтернативно, да се дозволи цената на овој производ да се зголеми во согласност со растот на цените на пченицата.
Ова здружение побара од Владата на Србија и од министерствата за внатрешна и надворешна трговија, за финансии и за земјоделство веднаш да се укинат максимални цени на производителите и малопродажбата. А тоа се однесува на пакувањата брашно со тежина од еден килограм (Т-400 и Т-500) или да не се продолжи оваа регулатива по 28 февруари годинава.
„Житоунија“, како што се наведува во соопштението, предлага на првата наредна владина седница да се измени регулативата и да се зголеми производната цена на брашното Т-500 (пакување од килограм) од 40,9 на 45 динари, а на брашното Т-400 од 45 на 52 динари.
Главната причина за поднесување на ова барање е што месечниот економски ефект врз заштедите на едно семејно домаќинство е минорен и изнесува само околу 23 динари, но регулативата предизвикува значителна економска штета на производителите на мали пакувања брашно.
Втората причина е што цената на пченицата во меѓувреме се зголеми и поскапе за околу 20 проценти.
Директорот на „Житоунија“ Здравко Шајатовиќ за „Политика“ вели дека е неприфатливо трошокот за еден сегмент од социјалната политика да се префрла на деловни субјекти.
– Не сакаме да навлегуваме во поединечни мерки и цели на социјалната политика, но потсетуваме дека трошокот за мерките на социјалната политика мора целосно да се покрие од државниот буџет, што инаку е системско и законско решение, нагласува Шајатовиќ.
Во продавниците во Србија килограм брашно Т-400 чини 54,90 динари, според Правилникот за ограничени цени, а Т-500 - 49,90 динари, но во некои продавници брашното е значително поскапо во зависност од производителот, пренесува „Политика“.
фото freepic