Бизнис
„ДОСЕГА ВО ФОРМИРАЊЕТО НА ЦЕНИТЕ НЕ СЕ МЕШАЛА НИТУ ЕДНА ВЛАДА“, реакција од трговците на големо и мало, кои бараат итна средба со Владата
13.02.2025
Стопанска комора на трговци на големо и мало претежно со прехранбени и непрехранбени производи, пијалоци и тутун бараат за итна средба со претставници од Влада, на која ќе се разгледува состојбите во врска со одлуката за ограничување на маржите на основните прехранбени продукти, детергентите и бебешката храна.
- Со ваквата одлука, ние како трговци, ќе бидеме ставени во ситуација, да го доведеме во прашање опстанокот на нашите компании, од причина што со ваква маржа нема да можеме да опстоиме. Воедно, ќе мора да донесуваме и рестриктивни одлуки, за отпуштање на нашите вработени и реструктурирање на работењето и затворање на маркетите. Штетите ќе бидат големи, бидејќи во прашање се доведува опстојувањето на 86 трговски фирми, со 790 продавници и 4700 вработени. Овие податоци, како Влада сметаме, треба да Ве загрижуваат, се наведува во соопштението до јавноста доставено од Стопанската комора на трговци на големо и мало претежно со прехранбени и непрехранбени производи, пијалоци и тутун, која е основана на Основачко собрание на 10.02.2025 година и е во фаза на упис во Централниот регистар.
Во нивното соопштение до јавноста се изнесуваат ставовите во врска со најновата одлука за ограничувањето на маржите до 30 април. Како што е познато Владата го задолжи Министерството за економија да донесе одлука за 10-процентно ограничување на маржата во трговија на мало и за 10 проценти на трговија на големо на основните прехранбени производи на истите 73 групи на производи кои беа во претходните кошници, а истата да се дополни со средства за хигиена како што се детергентите, како и со бебешката храна и други непрехранбени производи кај кои е забележана многу висока маржа, а истите се дел од основните потреби на граѓаните, со очекување да бидат вклучени над 100 групи на производи, ја примивме со голема загриженост.
- Нашето опстојување, е оптоварено и со останатите давачки, како на пример, цената на електричната енергија јануари 2024 – јануари 2025 е зголемена за 72%, за дистрибуција 25%. Платите, во 2024 споредено со 2023 година се зголемени околу 20%, а од март ќе има ново покачување, а трошоците за платите се движат од 12 до 15%. Освен овие, има и други комунални давачки, сервисирање на опремата со која работиме. Сите овие оптоварувања, немаме можност да ги издржиме со бруто-маржа од 10%, односно нема да можеме робата да ја ставиме на рафт, а не да ги услужуваме нашите потрошувачи, стои во рекацијата од Стопанска комора на трговци на големо и мало
Според објаснувањата на трговците, со 10% бруто-маржа, не можат да ги покријат оперативните трошоци од работењето, кои се движат од 15-20%.
Затоа, од Стопанска комора ја оспоруваат оваа одлука, за ограничување на маржите на 10 проеценти, во целост и барааат итно, да се најде заедничко решение, за оваа состојба. При носењето на одлуката за ограничување на маржите треба да се земат во предвид и анализите, кои покажаа дека „маркетите не се одговорни за зголемувањето на цените, туку ценовната политика ја водат доставувачите и производителите“.
- Никогаш не ги зголемуваме цените самостојно, туку промената се случува поради промените на цените на производителите или доставувачите и токму поради ова маркетите се под постојан притисок да се прифатат новите ценовници. Доколку тоа не се направи, не се испорачуваат производите.Од ова произлегува притисокот врз маркетите и од потрошувачите или за цените или за недостигот на производи. Само во јануари до маркетите се пристигнати ценовници од над 40 доставувачи и производители во 92 категории и поткатегории производи. Профитната маржа кај маркетите од година во година опаѓа, а кај нив се зголемува, објаснуваат од Стопанска комора на трговци на големо и мало.
Ако се погледнат бројките, се гледа и вистината, дека супермаркетите не се причината за зголемените цени. Додека трговците работат со минимални профити, доставувачите продолжуваат да остваруваат значителни маржи, без да ги намалат цените. Во таа смисла. согледувајќи ја состојбата, бараме да се пристапи кон изнаоѓање на причинителите на состојбите и да се бара одговорност од нив, а не да се префрла вината на трговците. Проблемот треба да се реши трајно, да се направи контрола за заработката и маржата од производителите и увозниците и на крај трговците. Ние бараме да се најде разумно решение, да се создаде хармонија помеѓу сите чинители, со цел да функционира целиот систем и да работиме успешно сите, како вистински деловни партнери, се наведува во соопштението испратено до јавноста.
Досега, во формирањето на цените, не се мешала ниту една Влада,бидејќи имаме пазарна економија и цените се формираат во зависност од понудата и побарувачката, ако има зголемена понуда, цените сами се намалуваат, без да интервенира Владата, а за да се зголеми понудата, треба да се зголеми производството, информираат од Стопанска комора на трговци на големо и мало.