Бизнис
Растот на цените на сировото кафе не покажува знаци на забавување! Во земјава цените на кафето сеуште се пониски во споредба со регионот
13.02.2025г.
Рекордниот раст на цените на сировото кафе не покажува знаци на забавување на светските берзи, забележуваат аналитичарите. Тие предупредуваат дека тоа би можело да потрае со години, додека не закрепне производтсвото и понудата на еден од најтргуваните и најпосакуваните производи во светот. Моментално на берзите кафето има највисока цена во последните 50 години.
Оваа тенденција неминовно се одразува и на регионот и на домашниот пазар, поради што производителите во Македонија и регионот се принудени да ги зголемат цените на своите производи. Споредено со земјите во соседството цените на кафето во Македонија се пониски, што прави притисок кај домашните производители за нови корекции. На пример, цените во Косово се околу 3 евра за 200гр турско кафе.
Со оглед на тоа дека кафето е еден од најважните производи за многу потрошувачи, зголемувањата на цените ги погодуваат буџетите на домаќинствата. Сепак, експертите забележуваат дека зголемувањето на цените на кафето не е резултат на желбата на производителите да профитираат на сметка на потрошувачите, туку повеќе е неизбежна последица на глобалните економски и климатски фактори. Причините се многубројни: опаѓање на приносите во клучните региони, климатски катастрофи и неправилности во глобалното снабдување
Историски максимум на цената на кафето арабика на берзите
Цената на кафето арабика продолжува да расте достигнаувајќи го својот историски максимум, како последица на намалените испораки и во пресрет на веројатното намалување на жетвата во Бразил во 2025 година предизвикано од топлото и суво време. Фјучерсите за сортата арабика на берзата International Exchange Inc. (ICE) утринава пораснаа за 2,4 отсто до $3,87 долари за фунта (0.4 килограми), претходно за време на тргувањето достигнувајќи историски врв од 3,88 долари. Во меѓувреме, земјоделците во Бразил го чуваат родот непродаден, надевајќи се на натамошен раст на цените на зрната во услови на неизвесни прогнози за жетвата оваа сезона.
Домашните производители на кафе нагласуваат дека во оваа ситуација квалитетот на кафето останува нивен приоритет бидејќи сакаат да ја задржат довербата на потрошувачите и да им обезбедат кафе кое ги задоволува стандардите на кои се навикнати. Само со стабилизирање на глобалниот пазар и производствените синџири ќе можеме да очекуваме стабилизација на цените во иднина.
Според worldcoffeeresearch.org производителите на кафе се пред голем предизвик.
Ситуацијата наметнува итна потреба за нови технологии и иновации кои ќе им помогнат на земјоделците да се справат со комбинираните предизвици на екстремните временски услови, штетници и болести. Постои широк консензус дека инвестициите во земјоделското истражување и развој може да донесе значителни долгорочни придобивки за земјоделците, индустријата и националните економии, како и за крајните потрошувачи.
2025 година и првите поскапувања на кафето. Што следи?
Пред нас е предизвикувачка година, но она што не чека понатаму е под голем знак прашалник! Прогнозите за претстојната жетва во Бразил не се ветувачки. Ако им се верува на експертите, нивните проценки се дека поскапувањата ќе продолжат, можеби само малку поумерено. Побарувачката расте, производството се побавно закрепнува, па не се знае кога ќе се стабилизира синџирот на снабдување, а со тоа ќе се стабилизираат и цените, односно дали воопшто ќе има стабилизирање.