Бизнис
СТРАНСКИТЕ КОМПАНИИ СО БРОЈНИ БАРАЊА ЗА ПОДОБРЕНА БИЗНИС КЛИМА ВО 2025, презентирани податоците од Анкетата за странските директни инвестиции
12.02.2025
Мал дел од барањата на странските компании кои работат во Македонија, а кои беа предложени за подобрување на деловната клима во земјата, се исполнети во текот на минатата година. Очекувањата на странските компании за годинава се дека ќе биде остварен приближно истиот физички обем на производството, а кај дел од компаниите се очекува намалување на нарачките за 17 отсто. Во автомобилската индустрија во Македонија се очекува намалувањето да биде во просек од десет до 25 отсто. Ова не значи и нужно намалување на бројот на вработените во овие компании, но за тоа ќе биде потребна и државна помош преку ослободување на придонесите за најавеното зголемување на минималната плата. Ова беше речено во Стопанската комора на Северна Македонија, каде се одржа настан на тема: „Презентација на резултатите од Aнкетата за странските директни инвестиции за 2024 година“.
Во анкетата учествувале 50 компании странски инвститори кои вработуваат 40.000 работници. Овие компании имаат инвестирано 4 милијарди евра од почетокот на нивната работа во земјава, а само лани тие инвестирале 270 милиони евра.
- Половина од компании или добиваат државна помош или се во процес на добивање на помош. На речиси сите им доцнела исплатата на државната помош. За 90 % од анкетираните компании не се доволно јасни правилата за државна помош и затоа предлагаме да се формира посебно тело каде што ќе можат да најдат информации за сите промени на законите и правилата за работа во земјава, изјави Виктор Мизо, претседателот на Советот на странски инвеститори.
Барањата на странските инвеститори се однесуваат на: формирање на посебно тело кое ќе функционира по системот One Stop Shop и кое ќе ги има сите податоци за измените на законите во земјата, подобрување на исплатата на државната помош, олеснување на постапките за странските работници како и брза реакција на случувањата во Европа за да се задржат странските инвеститори во земјата.
Странските инвеститори очекуваат конечно да се реши прашањето со неусогласените царински стапки со ЕУ каде што се пласира најголемиот дел од производството.
- Царински стапки за увоз на репроматеријали и компоненти од азиските земји се меѓу 10 и 15%, а во Европската Унија тие се меѓу 0 и 2,7%. Тоа креира голема разлика од она што го увезуваме со она што го произведуваме и извезуваме. Нашите производи стануваат неконкурентни за извоз во Унијата затоа бараме хармонизација на царинските стапки со европските, вели Мизо.
Инвеститорите како главни ризици ги во работењето ги посочуваат: немањето доволен број и квалитетни работници, намалување на нарачките, зголемувањето на цената на репроматеријалите и компонентите, условите за водење на бизнисот, како и корупцијата, инфраструктурата и неусогласените царински стапки за увоз на репроматеријали со оние во Европската Унија кои ги прават неконкурентни нивните производи на европскиот пазар