Бизнис
СТАНБЕНАТА КРИЗА ВО ГЕРМАНИЈА ПРОДОЛЖУВА И ГОДИНАВА, слабата понуда може да предизвика социјална експлозија предупредуваат експертите
07.02.2025
Кризата во германската изградба на станови се прошири на почетокот на 2025 година, со слаба побарувачка и покрај недостигот на станови, покажува истражувањето на економскиот институт ИФО.
Во јануари над половина од анкетираните менаџери во секторот за изградба на станови или 57 отсто, се пожалија на недостаток на нарачки. Во декември 2024 година, овој процент изнесуваше 53,6 отсто.
Падот во станбената изградба во Германија почна на почетокот на 2022 година и го достигна дното пред околу една година.
- Состојбата не е значително подобрена и кризата стана „нова нормала“, заклучува шефот на институтот. Ниту намалувањето на каматните стапки на ЕЦБ не помогна многу, посочуваат од ИФО.
Многу градови во Германија се соочуваат од недостиг на станови и скок на кириите. Во 2022 година Берлин доби повеќе од 75.000 нови жители, а беа изградени само 15.000 нови станови.
-Јазот меѓу многу силната побарувачка за поволни станови и слабата понуда може да предизвика социјална експлозија, предупредува шефот на здружението на градежни компании, Тим-Оливер Милер.
Поради високите кирии и поврзаните трошоци за домување, повеќе германски граѓани се сиромашни. Многу домаќинства трошат повеќе од една третина од својот приход за домување, а по плаќањето на киријата и поврзаните трошоци за домување и плаќањето камати за заеми и други слични сметки, повеќе од 17,5 милиони граѓани имаат приход што ги става во сиромашната група, покажа анализата на податоците.
Коалициската влада во заминување планираше најмалку 400.000 нови станови годишно, а податоците покажуваат дека нешто помалку од 300.000 биле завршени во 2023 година, пренесува „Индекс“.
фото freepic