Бизнис
ВИСОК ПАД НА ИЗВОЗОТ СО ГЕРМАНИЈА, РАСТЕ ТРГОВСКАТА РАЗМЕНА СО БУГАРИЈА
06.02.2025
Вкупната вредност на извозот на стоки од Република Северна Македонија, во периодот јануари – декември 2024 година, изнесува 7 781.2 милиони евра и бележи пад од 6,5 % во однос на истиот период од претходната година. Вредноста на увeзената стока, пак, во истиот период, е 11.062,4 милиони евра, што е за 0,8 % помалку од 2023 година. Трговскиот дефицит изнесува 3.281,2 милиони евра, соопшти Државниот завод за статистика.
Извозот на храна од Македонија за минатата година изнесува 590 милиони долари (раст од 10,8 отсто), а вредноста на увозот на храна е 1,154 милијарди долари (раст од 9,5 отсто).
Според вкупниот обем на надворешнотрговската размена, земјава најмногу тргувала со Германија, Велика Британија, Грција, Кина и Србија.
Во 2024 година извозот од Македонија во Европската Унија изнесува 6,4 милијарди долари и бележи намалување од 8,5 отсто, додека увозот изнесува 6,04 милијарди долари и има зголемување за два отсто. Македонскиот извоз во земјите од Западен Балкан изнесува 1,2 милијарди долари (раст од 6,1 отсто), а увозот е 1,05 милијарди долари (намалување од 2,2 отсто).
Извозот во Германија во периодот јануари-декември 2024 година бележи намалување за 15,4 отсто и достигна 3,3 милијарди долари, додека увозот минатата година е зголемен за 3,9 отсто и изнесува 1,3 милијарди долари.
Вкупниот обем на трговската размена меѓу Македонија и Бугарија надмина над една милијарда долари. Извозот во Бугарија изнесува 473 милиони долари (раст за 20 отсто), а увозот изнесува 635 милиони долари (раст од 21,6 отсто), објави Државниот завод за статистика.
фото freepic