Бизнис
ХРВАТСКА ЈА ПРОШИРИ ЛИСТАТА НА ПРОИЗВОДИ СО ОГРАНИЧЕНИ ЦЕНИ
30.01.2025
Во новата одлука на хрватската влада за ограничување на цените на производите од потрошувачката кошница се опфатени 70 артикли, за разлика од претходната листа на која беа 30 производи, изјави Анте Шушњар , министерот за економија. Новата листа ја презентираше на владина средба со претставници на трговските синџири и производители на храна, на која се разгледаа и натамошни чекори за заштита на потрошувачите.
На новата листа за ограничени цени се најдоа: леб, палента, каша од јачмен, житарки, двопек, тестенини, сувомеснати производи, конзервирани производи, риба, а има и дополнителни млечни производи. Секој продавач ќе треба да избере барем еден производ од таа група, па на пример, од сите шпагети што се нудат во продавницата, барем еден ќе мора да има ограничена цена. Сепак, може да има повеќе, што зависи од трговецот и тоа би било добро, појасни министерот за економија.
Информирањето на потрошувачите за ограничените цени ќе биде задолжително, бидејќи производите со ограничени цени ќе треба да бидат јасно означени и истакнати.
Трговците, рече тој, ќе мора да ги прикажуваат претходните цени заедно со моменталната цена и редовно да доставуваат информации за цените.
Ќе треба да ги информираат потрошувачите и за намалените цени, а оние кои работат на простори поголеми од 400 метри квадратни ќе треба да имаат посебна полица за производи со ограничени цени.
- Целта на мерките е дополнително да се ублажат инфлаторните притисоци. Главната цел е да се заштитат најранливите групи граѓани, рече тој.
Претходно, премиерот Андреј Пленковиќ рече дека Владата го искористила просторот за своето дејствување за заштита на стандардот на граѓаните и тоа го направила преку фискални мерки и ограничување на цените на некои производи, а денеска објавува нова листа од 70 производи со ограничени цени.
- Државата реагираше, но мора да се вклучат и други, рече Пленковиќ, тврдејќи дека никој немаше да банкротира ако цените беа малку поумерени, пренесува „Пословни дневник“.