Во Германија се подготвува пилот проект за инсталирање на соларни системи долж автопатиштата  во близина на површинскиот коп за јаглен Гарзвеил, во Северна Рајна Вестфалија. Оваа иновативна идеја може да биде еден од моделите за енергетската транзиција на германскиот енергетски сектор по исклучувањето на користењето на јагленот во производството на електричната енергија.

Заради оптималното искористување на енергијата од сонцето треба да се користат крововите на зградите и зелените површини. Но, за полесно да се прифати зелената енергија од локалното население  германските власти преминуваат на иновативното решение за соларен автопат, кои имаат поголем потенцијал за развој на одржливата  енергетска инфраструктура.

Истражувањата на енергетските компании покажуваат дека на овој начин можат да бидат инсталирани соларни системи со моќност од 24 мегавати на патните делници во должина од 30 километри, во близина на површинскиот рудник за јаглен.

Во Германија има 13.200 километри автопатска патна мрежа и покрива пет отсто од територијата на земјата. Теоретски потенцијалот на „патните“ соларни електрани изнесува 300 гигавати електрична енергија, пренесува „Бизнис.ба“.