Вести
Засега не е познат точниот број на загинати во пожарите во Лос Анџелес, наредба за евакуација на 180.000 жители
09.01.2025
Во округот Лос Анџелес сè уште има 179.783 жители под наредба за евакуација, изјави денеска шерифот Роберт Г. Луна.
- Тоа се скоро 180.000 луѓе во округот Лос Анџелес кои моментално се под наредба за евакуација, а уште близу 200.000 жители се под предупредување за евакуација, рече Луна.
Предупредувањата за евакуација се совети за жителите да се „подготват“ да ги напуштат своите домови веднаш, појасни Си-Ен-Ен.
Шерифот рече дека одбивањето на некои луѓе да ги почитуваат наредбите за евакуација ги става во опасност животите на службениците за спроведување на законот.
- Не можам доволно да нагласам дека ги повикувам жителите од кои се бара да се евакуираат да ги следат нашите предупредувања, рече Луна
Засега не е познат точниот број на загинати во пожарите во Лос Анџелес, изјави денеска шерифот на округот Лос Анџелес Роберт Луна.
Најмалку пет лица загинаа во пожарите, соопштија официјални лица. Сепак, Одделот на окружниот шериф работи со соодветни служби за „да ги утврди тие бројки“, рече Луна на прес-конференција.
- Ова е криза и не знаеме што да очекуваме. Бидете трпеливи со нас кога ќе нè прашате за бројот на загинати. … Во моментов, искрено, сè уште не знаеме, рече Луна.
Луна смета дека сегашниот број на загинати ќе се зголеми.
- Се надевам дека грешам, но мислам дека ќе се зголеми, рече тој.
Извор/фото МИА