Бизнис

СКСМ: Новиот закон за работни односи треба да биде прилагоден на модерните и идните текови на пазарот на труд

Ние многу јавно и транспарентно ќе говориме за новиот закон за работни односи во периодот што претстои. Денес до Владата и до Министерството за труд и социјална политика доставивме мислење по работната верзија на законот со коментари и конкретни предлози напишани на 47 страници“, стои во соопштението на Комората.

Важечкиот Закон за работни односи во изминатите години често се менуваше. Беше донесен на 28 јули 2005 година, кога министер за труд беше Стевчо Јакимовски, и од тогаш до денес е менуван дури 26 пати. Има уште 13 одлуки на Уставен суд со кои се укинати некои членови од Законот. Така што создадени се сите услови за ново законско решение.

Дополнително, работните односи помеѓу работодавачот и работникот се доста променети за разлика од минатото. Целта на работодавачите е да ги задржат и дообучат своите квалитетни работници, како и да придонесат за подобрување на нивниот личен живот.

Неопходен ни е закон кој односите меѓу работниците и работодавачите нема да ги гледа низ призмата на спротивставени страни, туку на партнери кои заеднички делуваат кон остварување на своите интереси:

1.            Интересите на работодавачите за зголемување на продуктивност на работниците, поголема конкурентност и профитабилност на компаниите,

2.            И интересите на работниците за соодветно валоризирање на сработеното и остварување повисоки примања.

Во тој контекст, новиот закон за работни односи треба да биде прилагоден на модерните и идните текови на пазарот на труд и да придонесе за подобрување на генералните состојби во стопанството и во државата, велат од Комората.

ПРЕПОРАЧАНО